幸運星球快攻更出色 兆文 18/09/2024 昨朝有3匹參戰馬到大圈出試，全部由助手踱一圈，「精彩駿將」淡定輕鬆完成，馬身收靚進度好；「龍船快」一貫頭岳岳，神態活躍，火力充裕；「電訊巴打」平淡走過，毛色亦淡淡哋，未復舊觀。以下是心水推介： 「幸運星球」早前濕泥地試閘得第6。 第3場「幸運星球」一早證明谷草啱跑，上季尾舊地重遊終於得手，吸引在變招搶放效果出色，而且跑出超快時間。「幸運星球」最近大閘試得唔好，純粹當日在濕泥地出試，全程在後食泥頭，搞到心情唔好。 第7場「鈦易搵」上季11戰從未失落獎金，但上仗復出竟然跑包尾，入直路沿途塞車根本冇跑過，相隔10日後再出，今次轉戰首本路程谷草1200米，更換上布文決心補中，剛周日「共享富裕」成功例子珠玉在前，放心追捧。 第8場「木火兄弟」初跑谷草即勝二班賽，更跑出1分37秒9全港紀錄時間，今次比當時只孭重2磅，形勢依然有利，同場快馬多，8檔起步影響唔大。上周六拍跳墜手急勁，弗到震！